المرايا ضوات

بكْ ما سخيت
اليوم شْكيتْ
عليكْ و بكْ
و غدّا
ارتحِتْ حيث حكيتْ
... راسْ الخيطْ
يلا شدّيتيهْ
كل شي يتعرّى
ساهلة...
بدا من الاَوّل خيطْ بخيطْ
راها صعيبة يْلا كانت عقدة
رخفْ زيّر
تمشي ترخف، تخافْ تزيّرْ
تمشي تزيّرْ.. يمكن ترخف
ها هي بانتْ
وما تنحلّ
يمكن تكون مرخوفة
ولاّ مزيّرة حيث عقدة

انفخ
انفث
صوط
اصرخ اغوّت
يسمعوك الحيوط
و يتقلقوا الرهوط
يقدروا يكونوا سباب هاذ العيوط
قَلبْ صدرك
راها شوكة
شوف جنابك
قبل ما تظن راها ناغزاكْ
آهيا ذاك
شوف شحال راك ناغز
قبل ما تردْ بالك
أو تحضي سروالك
شوف
شحال بحالك
و قبل هاذي وذيك
شحال راك دابْرْ
شحال راك اللي في بالكْ
...
العين ضوايا
حاضيا و حضّايا
لامعه تغمز
و تعمي عينين اللي يلمز
العين غطا
ساترة حال مولاها
و فضايح شلاّ هي ساتره
عين ميكا
بحال يلا شفتي
و لكن ماشفتي والو

عين الصفيحة بهيمة
المعيور في التبريمة
و الحدّ بها شكيمة

العين في المحنة
تشكي بالدمعة
على فراق
على ضيّ شمعة

و العين باكية
بجيلالة راحت تسوّق الجذبة
تهلل بجوارح
و تصوط بحموم الغابة الساكناني
ندكّ الارض بقدامي
كيف نارك كي نيراني
و فين هاذ الكيّ
و فين هاذ الشيّ
وانا نجذب بذيك الارواح الساكناني

شحال سافرت بها
سحابة عابرة الجبال
شحال اغتسلت بها
غمامة مخترقة الاشجار
شحال و شحال
مرة هي اصوات تجري ساقية اركاني
مرة لهيب
يحرق في اشجاني
مرة مايّا تسقيني
تقرّقني بالعاني
تلعب بيّا
ضحَكْتْ عليها كرة
و ضحكت هي عليا كُرة
تَرّْبَتني و كملّت بلا بيا
بلا اعمار بلا اصوات ترعاني
ها علاش انا قلت
خليوني براني
اولا حتى انتوما؟
...
ضحكتوني ثاني
...
وُشحال سافرتْ!ـ