اضْفِي الضّو!ـ

اضفي الضو

خلّي الموج يهدْر

يلفظ عظامو على حافة الليل

الشمس ما لقات سرّْها

و السرّْ

ما لقى شمس تضمد جراحو

اضفي الضو

الحكاية رْمْلْ

داسوووه رجلينْ

و نهبوووه يدّينْ

قْصُورا هاذو

تبناوْا

وْ غْبرة هاذي

ساحت على النيف

و الليل ساكتْ

حيث الشمس ضاحكة على رقصة عْمْياَ

ما بْغاتْ تشري لعراها ثوبْ

واَلاَ تسترْ حكايتها الحاميه

و اللي ما حماها تكوى يدّيه

اضفي الضو

آهيا هاذاك

راه الجلالب بالليل تفصل

بالليل تخيَّطْ

و القوالب بالنهار تتركبْ

البْحَرْ دوَا

تكلّمْ و هضرْ

ضحك من جديدْ

على الكمرة

ظْنّتْ الضو من بهاها

شارْ ليها

بجناب الليل

انتِ مصباح

بهْ انتِ تْنَبّْتِي الاحزان و الافراحْ

ضوّك من غيرك

ضحْكَتْ عليك الشمسْ

حاكْرا على الكْنفود

و ما نتِ حاضراَ

وَالاَ ساهرا

على ظلام غيركْ

ما انتِ شاهداَ

على شوانطْ و شَلاّ شوانط

عرّي على الشمسْ

ما تخلّيها تسخر من ليلْكْ

فضحي النهار اللي تْعامَا

وِيلاَ اسْتَقَلّيتي من هاذْ الكون

ما تضربك نداما

و انتَ يا نفاية البر

يا اللي من الملح تّقْهَرْ

بِيَا راكْ تْمُوجْ

مدّ و جزْرْ

أُرَاكْ نسيتي

نفسك من ميزاني

و خلايْقك بْيَا

عاشو عْمْرْ

ذيلْكْ جامدْ

و فمكْ يَعْمْرْ بالرمَلْ

تعيا ما تَلَقَّفْ في جمرْ

بلحيحتك ديما ناشفا

غير من مياه تهدر

اضحكْ عليّا

نضحكْ عليك

و الحكايا فوقنا

مرْكّْبَا حديث و مغزلْ

لا انتَ

لا أنا

لا ذيكْ الشمس

لا ذوك النوامسْ

غير معاني

على قوالب لسان تْقّْهَرْ

وُ خاف لا يْتَحَجّرْ

قال آجي نصيّرْكمْ

في الفجرْ

قبل ما نوَلّي أنا

فْ قبرْ